Seýdiniň nebiti gaýtadan işleýän zawodynyň 15-nji başlangyç hünär okuw mekdebi şäheriň owadan binalar toplumynyň birinde ýerleşýär. Hünärler ojagynda ýurdumyzyň ykdysadyýetinde möhüm orny eýeleýän nebitgaz toplumynyň, şeýle-de beýleki pudaklaryň edara-kärhanalary üçin gerekli hünärleri uly höwes bilen öwrenýän ýaş ýigitler we gyzlar okaýarlar.
— Häzirki wagtda bizde talyplaryň 500-den gowragy hünärleriň dokuzysy boýunça okaýar. Mugallymlarymyz olaryň peýdaly hünärleri kämil derejede ele almaklaryny gazanmak ugrunda ýadawsyz alada edýärler. Mekdebimizde okuwlary netijeli guramak üçin ähli zerur şertler we giň mümkinçilikler bar — diýip, başlangyç hünär okuw mekdebiniň direktorynyň okuw-terbiýeçilik işleri baradaky orunbasary Gültäç Joraýewa gürrüň berýär.
