Milli Liderimiz ýurdumyzyň dürli pudaklaryna, şol sanda nebit we gaz pudagyna täze innowasion, sanly tehnologiýalary ornaşdyryp, elektron resminamalar dolanyşygyna geçmek, bäsleşige ukyply sanly ykdysadyýeti, sazlaşykly işleýän elektron senagatyny döretmek, sanly aragatnaşyk babatda şäherleriň we obalaryň arasyndaky tapawudy aradan aýyrmak wezipelerini öňe sürýär. Öňde goýlan bu wezipeler ýangyç-energetika toplumynyň maddy-enjamlaýyn binýadynyň mundan beýläk-de pugtalandyrylmagyna, önüm çykarylyşynyň artdyrylmagyna, pudakda maglumat-aragatnaşyk üpjünçilik ulgamynyň ösdürilmegi ugrunda alnyp barylýan işleriň has-da ýaýbaňlandyrylmagyna getirer.
Sanly ykdysadyýetiň ornaşdyrylmagy we ösdürilmegi esasy önümçilik ykdysady işleriň ähli görnüşleriniň awtomatlaşdyrylmagyny we merkezleşdirilen tertipde dolandyrylmagyny üpjün etmäge, önümçilik we sarp ediş bazarlarynyň ösdürilmegine, ykdysady işiň subýektleriniň umumy netijeliliginiň ýokarlanmagyna, maglumatlary alyşmagyň hasabyna bilimleriň kämilleşdirilmegine, ýokary tehnologiýaly pudaklarda täze, döwrebap iş orunlarynyň döredilmegine giň mümkinçilikleri açýar.
