18-nji noýabrda Türkmenistanyň Halk Maslahatynyň Prezidiumynyň mejlisinde ýurdumyzyň ähli welaýatlaryny senagat taýdan ösdürmek boýunça giň gerimli geljekki meýilnamalar hödürlendi.
TDH-nyň habar bermegine görä, mejlisde Ministrler Kabinetiniň Başlygynyň orunbasary B.Annamämmedow «Türkmenistany senagat taýdan ösdürmegiň 2030 — 2045-nji ýyllar üçin Milli strategiýasynda» kesgitlenen wezipeleri ýerine ýetirmek üçin meýilleşdirilen çäreler barada hasabat berdi. Bellenilen amaly ädimleriň esasy maksady ýurdumyzy senagat taýdan ösen döwlete öwürmek boýunça alnyp barylýan işleri täze derejä çykarmakdyr.
Hususan-da, strategiýany durmuşa geçirmegiň çäklerinde Ahal welaýatynda gurluşyk, himiýa we energetika pudaklarynyň önümçilik kuwwatlyklaryny artdyrmak, gazhimiýa önümleriniň öndürilişini giňeltmek, aýna we dokma önümlerini öndürýän täze kärhanalary döretmek, azyk senagatyny ösdürmek, ýol-ulag infrastrukturasynyň gurluşygy üçin zerur materiallaryň önümçiligini ýola goýmak, hereket edýän kärhanalary döwrebaplaşdyrmak we olara innowasion tehnologiýalary ornaşdyrmak göz öňünde tutulýar.
Balkan welaýaty boýunça esasy ugurlar hökmünde karbamid öndürýän toplumyň 2-nji tapgyryny gurmak, ýod, brom, tehniki hem-de nahar duzunyň önümçiligini ösdürmek, utgaşykly dolanyşykda işleýän elektrik stansiýasynyň we köpugurly Gün we ýel elektrik stansiýasynyň esasynda önümçiligi giňeltmek kesgitlendi.
Daşoguz welaýatynda gazhimiýa önümçiligini ösdürmek, hususy ulgam tarapyndan oba hojalyk önümlerini gaýtadan işleýän senagaty giňeltmek bilen bir hatarda, ýerli çig mal esasynda täze önümçilik kuwwatlyklaryny döretmek göz öňünde tutulýar.
Lebap welaýatynda kükürt, kaliý we daş duzlary ýaly tebigy serişdeleriň esasynda dag-magdan önümçiligini ösdürmäge, şeýle hem gurluşyk garyndylaryny we gipsokarton önümlerini öndürýän döwrebap kärhanany işe girizmäge aýratyn ähmiýet berilýär.
Mary welaýatynda gurluşyk materiallary senagatyny ösdürmek, täze önümçilik kärhanalaryny döretmek, hereket edýän kärhanalaryň maddy-enjamlaýyn binýadyny döwrebaplaşdyrmak, olarda innowasion tehnologiýalary we dolandyryş usullaryny ornaşdyrmak meýilleşdirilýär.
Hasabaty diňläp, Halk Maslahatynyň Başlygy ýurdumyzyň senagat diplomatiýasyny alyp barýandygyny, dünýä döwletleri we daşary ýurt kompaniýalary bilen işjeň hyzmatdaşlyk edýändigini belledi.
Gahryman Arkadagymyzyň nygtamagyna görä, Ahal welaýatynda tebigy gazdan «ECO-93» kysymly benzin öndürýän desga guruldy, Balkan welaýatynda täze elektrik stansiýasy gurulýar, Daşoguz welaýatynda azotly dökünleri öndürýän toplum gurulýar, Lebap welaýatynda bolsa kaliý dökünlerini öndürýän toplum hereket edýär. Bu ýagdaýda Gurbanguly Berdimuhamedow gurulýan desgalara Ýokary gözegçilik edarasynyň berk gözegçiligini üpjün etmegiň wajypdygyna ünsi çekdi.
Soňky döwürde önümçilige döwrebap tehnologiýalaryň işjeň ornaşdyrylýandygyny nygtap, Gahryman Arkadagymyz wise-premýere önümçilikde ýokary tehnologiýaly önümleriň paýyny artdyrmak, maglumat merkezlerini we müňlerçe täze iş ornuny döretmek boýunça degişli işleri geçirmegi tabşyrdy.