Hormatly Prezidentimiziň halkymyzyň ýaşaýyş-durmuş derejesini has-da gowulandyrmak baradaky sahawaty esasynda döwletimiz tarapyndan ilatymyza berilýän milli baýlygymyz — tebigy gaz her bir öý-ojaga eşret paýlaýar. Bagtyýar halkymyzyň tebigy gaz bilen üznüksiz üpjün edilmeginde «Türkmengazüpjünçilik» birleşiginiň önümçilik düzümleriniň gazçylarynyň mynasyp paýy bar. Bu ugurda birleşigiň «Marygazüpjünçilik» müdirliginiň Mary welaýatynyň etraplaryndaky hem-de şäherlerindäki gaz hojalyk edaralarynyň işgärleri hem zähmet göreldesini görkezýärler. Olar döwletimiziň Garaşsyzlygynyň 30 ýyllyk şanly toýunyň uly dabara bilen baýram ediljek ýylynyň her bir iş gününde arman, ýadaman, gaýratly zähmet çekýärler.
Müdirligiň «Şatlykşähergaz» gaz hojalyk edarasynyň hünärmenleriniň hem-de işçileriniň sarp edijilere tebigy gazyň meýilnama laýyklykdaky möçberini ýylyň bütin dowamynda üznüksiz ýetirmekdäki nusga alarlyk işleri-de aýratyn bellärliklidir.
