Türkmen-russiýa söwda-ykdysady hyzmatdaşlygynyň, şol sanda nebitgaz ulgamynda hyzmatdaşlygyň ösüşi Russiýa Federasiýasynyň Türkmenistandaky ilçisi Aleksandr Blohiniň žurnalistler üçin çarşenbe güni 12-nji iýunda bellenilýän Russiýa gününiň öňüsyrasynda geçiren brifinginiň esasy temalarynyň biri boldy.

«2019-njy ýylda Russiýa bilen Türkmenistanyň özara haryt dolanyşygy 1,5 esse artyp, 695 million amerikan dollaryna, türkmen gazynyň iberilmegini hasaba alanyňda bolsa 1 milliard dollara barabar boldy» diýip diplomat aýtdy.

Aleksandr Blohiniň bellemegine görä, 2020-nji ýylyň birinji ýarymy hem özara haryt dolanyşygynyň artýandygyny görkezýär. Netijede, birinji çärýekde haryt dolanyşygynyň möçberi 2019-njy ýylyň degişli döwri bilen deňeşdirilende 2,7 esse artdy.

Onuň belleýşi ýaly, bu ösüş täze iri taslamalaryň hasabyna üpjün edildi. Şol sanda, bellenilişi ýaly, «Возрождение» kompaniýasy Aşgabatda birnäçe gurluşyklary alyp barmak boýunça bäsleşikde ýeňiji boldy, «KaMAZ» Türkmenistanyň birnäçe pudaklary üçin dürli görnüşli tehnikalary getirýär. «Tatneft» «Türkmennebit» döwlet konserni bilen hyzmatdaşlygyny dowam edýär. Russiýanyň zawodlary turbalary ibermek boýunça işleri alyp barýarlar.

«Ähli ugurlar boýunça, şol sanda ykdysady ulgamda, hususan-da, gaz ulgamynda biziň oňyn gatnaşyklarymyz bar» diýip ilçi «Gazpromyň» «Türkmengaz» DK bilen baglaşan şertnamasynyň esasynda türkmen gazyny satyn almagyny dowam edýändigini belledi.

Diplomat iki dostlukly ýurduň arasynda strategiki hyzmatdaşlygyň ýokary derejesini saklamaga goşýan goşandy üçin türkmen tarapyna minnetdarlyk bildirdi.

«Türkmenistan bilen şu günki gatnaşyklarymyzy men ýokary derejede, iň bolmanda, meniň ilçilik edýän döwrümde ýokary derejede diýip bahalandyrardym» diýip Blohin belledi.

Russiýanyň Türkmenistan bilen nebitgaz pudagynda hyzmatdaşlygy barada aýdyp, ilçi Türkmenistan – Owganystan – Pakistan – Hindistan transmilli gaz geçirijisiniň gurluşygynyň taslamasy boýunça üstünlikli hyzmatdaşlygy belledi.

«Biz ibermäge taýýar. Bu taslama üçin turbalary, enjamlary eýýämden iberip başladyk. Netijede, TOPH gaz geçirijisiniň türkmen bölegi üçin uly diametrli turbalaryň 90 göterimini rus kompaniýasy getirdi» - diýip Blohin belledi.

Diplomat şeýle hem bu taslamanyň birnäçe babatda bähbitli taraplaryny aýtdy. Türkmen tarapynyň birnäçe gezek nygtap aýdyşy ýaly, TOPH gaz geçirijisi Owganystandaky ykdysady ösüşi we ýagdaýy durnuklaşdyrmaga ýardam eder.

Belläp geçsek, 2020-nji ýylyň 9-njy iýunynda Russiýa Federasiýasynyň Prezidenti Wladimir Putin RF-iň daşary syýasat ugruny durmuşa geçirmäge we köp ýyllyk asylly zähmeti üçin Russiýanyň Türkmenistandaky ilçisi Aleksandr Blohini Hormat ordeni bilen sylaglamak hakynda karara gol çekdi. A.Blohin W.Putiniň karary bilen 2011-nji ýylda Türkmenistandaky ilçi hökmünde bellenilipdi.