Dünýäniň ykdysady babatda güýçli depginde ösýän döwleti hökmünde ykrarnama eýe bolan türkmen Diýarynda uglewodorod çig mallaryny durnukly çykarmak, nebitdir gazy gaýtadan işläp, olary ýokary hilli harytlara öwürmek, iň bir kämil enjamlardyr tilsimatlary önümçilikde netijeli peýdalanmak bilen bu ulgamyň kärhanalarynyň tehniki binýadyny düýpli pugtalandyrmak, önümçilik düzümlerini ygtybarly döwrebaplaşdyrmak yzygiderli alnyp barylýar. Bar bolan maglumatlara görä, häzirki wagtda ilkinji energetika serişdeleriniň sarp edilişinde nebit birinji orunda bolmagynda galýar. Diňe bir soňky 50 ýylyň içinde tutuş dünýäde ýangyjyň esasy görnüşleriniň sarp edilişi 120 essä golaý artypdyr. Bar bolan çaklamalara salgylansak, häzirki wagtda Ýer şarynda «gara altynyň» tassyklanan gorlary 170 milliard tonna barabardyr. Şonuň 10 göterime golaýynyň biziň ata Watanymyzyň paýyna düşýändigi bolsa, juda buýsançly hakykatdyr. Beýik Biribardan türkmen topragyna rowa görlen bu uly baýlygy ýeriň jümmüşinden alyp, ony halkymyzyň jana-jan bähbitlerine gönükdirmek öz eziz il-ulsuny Berkarar döwletimiziň bagtyýarlyk döwrüne baky ýaran eden hormatly Prezidentimiziň döwlet syýasatynyň ileri tutulýan ugurlarynyň biridir. Biz bu hakykata Garaşsyz Türkmenistan döwletimiziň milli ykdysadyýetiniň nebitgaz pudagynyň kerwenbaşysy hökmünde giňden tanalýan Türkmenbaşydaky nebiti gaýtadan işleýän zawodlar toplumynda diňe bir soňky ýyllarda alnyp barylýan ägirt uly işleriň mysalynda-da aýdyň göz ýetirýäris. Dana döwlet Baştutanymyzyň taýsyz tagallalary netijesinde bu ägirt uly toplum juda gysga wagtyň dowamynda diňe bir sebitiň däl, eýsem, tutuş dünýäniň häzirki zaman kärhanasyna öwrüldi.
1943-nji ýylyň 5-nji iýunynda türkmen ýangyjynyň ilkinji tonnalaryny
sarp edijilere ýetiren bu kärhana mukaddes ýurt Garaşsyzlygymyza eýe bolan
ilkinji ýyllarymyzdan başlap ägirt uly özgertmelere eýe boldy. Kärhana uly
möçberde maýa goýumlarynyň gönükdirilmegi bilen bu ýerde katalitik
reforminginiň we milli sekunt katalitik krekinginiň desgalary, ýokary oktanly
benzin, çalgy ýaglaryny, polipropilen öndürýän desgalar, dizel ýangyjynyň
gidroarassalaýyş önümçiliginiň, şeýle hem üpjünçilik gurluşlarynyň häzirki
zaman desgalary guruldy. Netijede sanlyja ýylyň dowamynda, ozalky ýönekeý
zawodyň ornunda nebiti gaýtadan işlemegiň önümçiliginiň iň häzirki zaman
toplumy peýda boldy. Olaryň aglabasynyň diňe bir Merkezi Aziýada däl, eýsem,
tutuş dünýäde-de deňi-taýy ýokdur. Häzirki wagtda milli ykdysadyýetimiziň
kerwenbaşysyna öwrülen bu toplum etillenmedik awtomobil ýangyçlaryny, uçar we tehniki
kerosinlerini, reaktiw we dizel ýangyjyny, mazudy, çalgy ýaglaryny,
polipropileni, peç ýangyjyny, ýeňil gazoýly, nebit elektrod koksuny,
suwuklandyrylan gazy, gurluşyk we ýol bitumlaryny, sintetik ýuwujy serişdeleri
we ýene-de birnäçe nebit önümlerini taýýarlaýar. Toplumyň önümleri eziz
Diýarymyzyň eksport kuwwatynyň esasyny düzýänligi bilenem möhüm ähmiýete
eýedir. Munuň üstesine-de, hormatly
Prezidentimiziň yzygiderli hemaýat-goldawy netijesinde täzeden-täze döwrebap
desgalar bilen toplumyň üsti yzygiderli ýetirilýär.
