Nebitgaz senagatynyň ösüşinde nebiti we gazy çykarmagy köpeltmegiň esasy ugurlary netijeli tehnologik prosesleri ornaşdyrmakdan, öňüni alyş çärelerini geçirmek bilen, ulanyş guýularynyň fonduny saklamakdan, düýpli abatlaýyş işleri netijesinde guýularyň önüm berijiligini ýokarlandyrmagyň hem-de hereketsiz guýulary we täze gazylan guýulary ulanyşa goýbermegiň hasabyna olaryň hereket edýän fonduny artdyrmakdan ybaratdyr. Ylaýta-da ulanyş guýularyny abatlamagyň dowamlylygyny tizleşdirmek we harç edilýän çykdajylary azaltmak meseleleri wajyp bolup durýar.
Nebit we gaz guýularyny düýpli abatlamakda kähalatlarda tehnologik prosesleriň togtadylmagyna getirýän hadysalar ýüze çykýar. Olar nasos-kompressor turbalarynyň, oturtma, buraw sütünleriniň, buraw gurallarynyň gysylmagy ýa-da hatardan çykmagy hem-de guýynyň düýbünde nasos ştangalarynyň, tanap kabelleriniň, guýy hereketlendirijileriniň, gurallarynyň, gulplaryň, pakerleriň we beýleki tehnologik enjamlaryň gaçyrylmagy (ýolunmagy) netijesinde ýüze çykýar.
