Türkmenistanyň ykdysadyýetine daşary ýurt maýa goýumlaryny çekmek boýunça halkara forumy bolan TEIF 2025-iň energetika we durnukly ösüş ugurlarynda Halkara parahatçylyk we ynanyşmak ýylynyň çäginde geçiriljek iň möhüm halkara çäreleriň biri bolmagyna garaşylýar. Bu forumy özboluşly edýän esasy aýratynlyk – dünýäniň iň iri we abraýly energetika guramalarynyň ýolbaşçylarynyň gatnaşmagydyr.

Bu çärede OPEK-niň Baş sekretary Haýtam Al-Gais, Halkara energetika agentliginiň (IEA) ýerine ýetiriji direktory Fatih Birol, Gaýtadan dikeldilýän energiýa çeşmeleri boýunça halkara agentligiň (IRENA) baş direktory Françesko La Kamera, Gazy eksport edýän ýurtlaryň forumynyň (GECF) baş sekretary Mohamed Hamel, Energetika Hartiýasynyň Sekretariatynyň baş sekretary Atsuko Hirose ýaly halkara derejesinde tanalýan ýolbaşçylaryň gatnaşjakdygy mälim edildi.

Şular ýaly ýokary derejedäki wekilleriň gatnaşmagy Türkmenistanyň energetika boýunça halkara giňişlikdäki ornunyň barha ýokarlanýandygyny görkezýär hem-de onuň durnukly energetika geljegini ilerletmekde edýän tagallalarynyň ykrar edilýändigini tassyklaýar.

Dünýäde dekarbonizasiýa, sanlylaşma we energetika ulgamyndaky özgertmeler güýçlenýän döwürde, TEIF 2025 halkara jemgyýetçiligiň öňünde duran kynçylyklar hem-de mümkinçilikler boýunça pikir alyşmak üçin özboluşly platforma bolup çykyş edýär.

Şeýle-de, şu ýyl ASEAN-a (Günorta-Gündogar Aziýa ýurtlarynyň Assosiasiýasy) Malaýziýanyň başlyklyk etmegi hem-de forumyň Kuala-Lumpur şäherinde geçirilmegi bu forumyň halkara derejesindäki ähmiýetiniň beýgelýändigini görkezýär. Bu ýagdaý Türkmenistan babatdaky ynamy artdyrýar we ýurduň hyzmatdaşlyga, maýa goýumlara hem-de innowasiýalara açyk hyzmatdaş hökmünde çykyş edýän ornuny berkidýär.

TEIF 2025 diňe bir çäre bolman, eýsem dünýä energetika ulgamyndaky täze hyzmatdaşlyklaryň emele gelýän, durnukly ösüş ugrunyň kesgitlenýän we ynamly hyzmatdaşlygyň pugtalanýan öwrülişik nokadydyr. Şu nukdaýnazardan, türkmen halkynyň Milli Lideri, Gahryman Arkadagymyzyň 2025-nji ýylyň 19-njy martynda geçirilen “Parahatçylyk we ynanyşmak ýyly: Durnukly ösüşi üpjün etmekde sebitleýin hyzmatdaşlygyň orny” atly halkara maslahatdaky sözleri aýratyn ähmiýete eýedir: “Türkmenistan–Owganystan–Pakistan–Hindistan gaz geçiriji taslamasy häzirki döwürde 1 milliard 750 million ilaty bolan ýurtlary tebigy gaz bilen üpjün etmegi maksat edinýär”.

Şeýle hem “Türkmenistanyň halkara ähmiýetli ulag-energetika merkezi hökmünde ösmegi ýurtlaryň we halklaryň giň toparynyň bähbitlerine laýyk gelýär hem-de sebitleýin ynanyşmak we düşünişmek ýagdaýlarynyň pugtalandyrylmagyna hyzmat edýär”. Bu beýanatlar Türkmenistanyň energetika diplomatiýasy, parahatçylyk we durnukly ösüş boýunça halkara gün tertibini öňe sürmekde eýeleýän strategik ornuny görkezýär. TOPH taslamasy we Türkmenistanyň metan zyňyndylaryny azaltmak boýunça ählumumy başlangyçlara goşulmagy bu ugurdaky garaýyşlaryny has-da güýçlendirýär.

Şu günki gün dünýäniň üns merkezinde duran forum – TEIF 2025, diňe bir täze energetika geljeginiň şekillendirilýän ýeri bolman, eýsem, Türkmenistanyň bu ugry öňe sürýän möhüm hereketlendirijisi hökmünde çykyş edýän meýdançasydyr. Häzirki wagtda dünýäniň 30-dan gowrak ýurdunyň maliýe guramalarynyň hem-de energetika, infrastruktura we ýaşyl tehnologiýalar ugurlaryndaky öňdebaryjy kompaniýalarynyň wekillerini öz içine alýan 300-den gowrak wekiliniň gatnaşjakdygy tassyklandy.

TEIF 2025 forumyna göni gatnaşmak üçin hasaba alyş 2025-nji ýylyň 15-nji aprelinde tamamlanýar.

Has giňişleýin maglumat üçin: teif-turkmenistan.com

(maglumat TEIF 2025-iň guramaçylary tarapyndan berildi).