OGT-nyň ikinji gününiň merkezinde: Hazaryň deňiz bloklaryny özleşdirmegiň, Türkmenistanyň nebiti gaýtadan işlemeginiň we gazhimiýasynyň mümkinçilikleri
10:47 03.11.2020 9686
Söwda-senagat edarasynda guramaçylary «Türkmengaz» we «Türkmennebit» döwlet konsernleri çykyş edýän «Türkmenistanyň nebiti we gazy 2020» XXV Halkara maslahatynyň ikinji güni hem baý mazmunly boldy.
Birinji mejlis Hazar deňziniň türkmen bölegindäki deňiz bloklaryna maýa goýumlaryny çekmek mowzugyna bagyşlandy. Bu ýerde «Türkmengeologiýa» DK-nyň başlygy Merdan Rozyýewiň Hazaryň uglewodorod mümkinçiliklerini öwrenmek boýunça mundan beýläkki işleriň esasy ugurlary baradaky çykyşy boldy. Şeýle hem Hazar deňziniň türkmen böleginiň iň soňky geologo-geofizika maglumatlary hödürlenildi.
Deňiz känlerini özleşdirmekde Türkmenistanyň daşary ýurtly hyzmatdaşlarynyň çykyşlary onlaýn tertipde diňlenildi. Hazaryň deňiz bloklaryna maýa goýumlary nädip çekmeli diýen sowala PETRONAS Carigali (Turkmenistan) Sdn Bhd kompaniýasynyň baş ýerine ýetiriji direktory Ruslan Bin Abdul Gani öz çykyşynyň dowamynda jogap bermäge synanyşdy. Türkmenistanda alyp barýan işleri barada Dragon Oil kompaniýasynyň baş ýerine ýetiriji direktory Ali Al Jarwan çykyş etdi.
Deňizdäki nebit känlerini özleşdirmekde Demirgazyk Hazarda «LUKOÝL» kompaniýasynyň döwrebap tehnologiýalardan peýdalanmak tejribesi bilen «LUKOÝL - Nižnewolžskneft» OOO taslamasynyň menejeri Oleg Şumowskiý paýlaşdy.
Indiki mejlis nebitiň we gazyň monetizasiýasy meselesine hem-de bu ugurdaky täze maýa goýum mümkinçiliklerine bagyşlandy. Bu ýerde Türkmenistanyň Halkara nebit we gaz uniwersitetiniň rektory çykyş etdi. «Türkmengaz» DK-nyň Gyýanlydaky Polimer zawodynyň direktory kärhananyň işiniň täze ugurlary barada gürrüň berdi. «Schlumberger Logelco, Inc.» kompaniýasynyň baş direktory ulanyşdaky känlerde uglewodorod çykarylyşyna täze tehnologiýalary ornaşdyrmak tejribesi bilen paýlaşdy.
Günük ikinji ýarymy «Türkmenistanyň gazhimiýa we nebiti gaýtadan işleýän toplumy — netijeli hem ekologik howpsuzlygyň nusgasy» mowzugyna bagyşlandy. Bu mejlisiň çäklerinde Türkmenbaşynyň nebiti gaýtadan işleýän zawodlar toplumynyň ýolbaşçylarynyň, «Türkmengaz» DK-nyň Owadandepedäki gazbenzin önümçiligi boýunça zawodynyň, NAPECO kompaniýasynyň we başga-da birnäçe kompaniýasynyň ýolbaşçylary çykyş etdiler.
Olaryň çykyşlarynda kärhanalaryň täze maýa goýum mümkinçilikleri, halkara bazarlarynda ECO-93 gazbenzinini ýerlemegiň geljegi, uglewodorodlaryň eksporty boýunça täze çözgütler maslahatlaşyldy.
Energetiki barlaglar boýunça Oksford institutynyň ylmy işgäri Julian Bouden gaz boýunça global çaklamalary onlaýn görnüşde hödürledi.
Soňra moderatorlar tarapyndan mejlisleriň ählisiniň netijeleri jemlendi hem-de maslahatyň resmi ýapylyşy boldy.
Şol gün daşary ýurt kompaniýalarynyň Türkmenistanyň nebitgaz toplumynyň ýolbaşçylary bilen deslapdan ylalaşylan duşuşyklary geçirildi.
2021-nji ýylda «Gazprom» Türkmenistandan 10,6 mlrd kub metr gaz satyn aldy
2021-nji ýylda «Gazprom» Türkmenistandan 10,6 mlrd kub metr gaz satyn aldy. Bu barada Türkmenistanyň Prezidentiniň Russiýa Federasiýasynyň Prezidenti bilen duşuşygyna taýýarlanylan materiallarda aýdylýar. Duşuşyk 15-16-njy sentýabrda Samarkandda ŞHG sammitiniň çäklerinde meýilleşdirildi diýip, RIA Nowosti ýazýar.
Türkmenistanyň Prezidentiniň Ýaponiýa saparynyň jemleri boýunça resminamalaryň toplumyna gol çekildi
Prezident Serdar Berdimuhamedowyň Ýaponiýa amala aşyran saparynyň jemleri boýunça hyzmatdaşlyk hakynda resminamalaryň toplumyna gol çekildi. 15-nji aprelde Serdar Berdimuhamedowyň ýapon işewürleri bilen geçiren duşuşygynyň jemleri boýunça ikitaraplaýyn resminamalara gol çekmek dabarasy boldy diýip, TDH habar berýär.
Türkmenistanyň Prezidenti Saud Arabystanynyň täze ilçisi bilen hyzmatdaşlygyň ileri tutulýan ugurlaryny maslahatlaşdy
17-nji aprelde Prezident Serdar Berdimuhamedow Saud Arabystany Patyşalygynyň Türkmenistanda täze bellenen Adatdan daşary we Doly ygtyýarly ilçisi Amer bin Ali Al-Şehrini kabul etdi. Ol döwlet Baştutanymyza ynanç hatyny gowşurdy diýip, TDH habar berýär.
Kuala-Lumpur TEIF 2025 halkara maýa goýum forumyny geçirmäge taýýarlyk görýär
2025-nji ýylyň 23–24-nji aprelinde Malaýziýanyň Kuala-Lumpur şäherinde geçiriljek “TEIF 2025” Türkmenistanyň halkara maýa goýum forumynyň açylmagyna az wagt galdy. Forumyň Guramaçylyk toparynyň habar bermegine görä, bu möhüm waka gatnaşmak üçin hasaba alyş eýýäm tamamlandy. Foruma jemi 42 ýurtdan 355-den gowrak wekil gatnaşar.
Türkmenistanyň we Russiýanyň Prezidentleri ŞHG-niň sammtiniň çäklerinde ikitaraplaýyn duşuşyk geçirerler
Türkmenistanyň Prezidenti Serdar Berdimuhamedow we Russiýa Federasiýasynyň Prezidenti Wladimir Putin Şanhaý Hyzmatdaşlyk Guramasynyň çäklerinde ikitaraplaýyn duşuşyk geçirerler. Bu barada Russiýanyň öňdebaryjy habarlar agentlikleri RF-niň Prezidentiniň halkara işleri boýunça kömekçisi Ýuriý Uşakowa salgylanyp habar berýär.