Ýakynda biz häzirki wagtda dowam edýän abuna ýazylyşygyna, hususan-da, nebitgazçylaryň gazetine ýazylmagyna ýardam bermek we alnyp barylýan tutumly işler bilen ýerinde tanyşmak, işçi-hünärmenleriň armasyny ýetirmek maksady bilen nebitgaz toplumynyň Daşoguz welaýatyndaky edara-kärhanalarynyň birnäçesinde döredijilik saparynda bolduk. Onuň netijeleri boýunça «Daşoguzgazakdyryş» müdirliginiň, hususan-da, «Derýalyk» önümçilik edarasynyň häzirki günlerde alyp barýan işleri barada okyjylarymyza gürrüň bermegi makul bildik.
«Türkmengaz» döwlet konserniniň «Daşoguzgazakdyryş» müdirliginiň gazçylary Arkadag Serdarly bagtyýar ýaşlar ýylyny zähmet üstünliklerine beslemekde şu günler joşgunly zähmet çekýärler. Müdirligiň gazçylary türkmen gazynyň Döwletabat — Derýalyk ugry boýunça dünýä bazaryna çykarylmagy, şeýle hem welaýatyň ilatynyň, edara-kärhanalarynyň gymmatly «mawy ýangyç» bilen üpjün edilmegi ugrunda nusgalyk işleri alyp barýarlar.
