Türkmenistanyň we Filippinleriň wekilleri energetika ulgamynda hyzmatdaşlygyň mümkinçiliklerini maslahatlaşdylar
06:28 08.06.2025 3104
5-nji iýunda «Türkmengaz», «Türkmennebit» we «Türkmenhimiýa» döwlet konsernleriniň wekilleri Filippinler Respublikasynyň Energetika ministrligi bilen wideoaragatnaşyk arkaly duşuşyk geçirdiler. Bu barada Türkmenistanyň Ýaponiýadaky ilçihanasy habar berýär.
Duşuşykda filippin tarapyna ýurduň Energetika ministrliginiň Energetika syýasaty we meýilnamasyny düzmek býurosynyň direktory Maýkl Sinokrus ýolbaşçylyk etdi. Gepleşikleriň dowamynda Filippinleriň energetika ulgamynyň häzirki ýagdaýy, onuň geljekki ösüş meýilnamalary we ýurduň halkara hyzmatdaşlygyny giňeltmek babatyndaky gyzyklanmasy ara alnyp maslahatlaşyldy.
Türkmen tarapy öz gezeginde uglewodorod we himiýa serişdelerini özleşdirmek boýunça döwlet maksatnamalary, şeýle hem energetika we himiýa pudaklarynda durmuşa geçirilýän iri taslamalar barada giňişleýin maglumat berdi. Şeýle-de daşary ýurt hyzmatdaşlary bilen alnyp barylýan bilelikdäki işler barada maglumat ýetirildi.
Taraplar özara gyzyklanma döredýän hyzmatdaşlygyň geljekki ugurlaryny ara alyp maslahatlaşdylar. Duşuşygyň netijesinde gepleşikleri dowam etdirmäge hem-de degişli ugurlarda bilelikdäki teklipleri taýýarlamaga gyzyklanma bildirildi.
Türkiýä, Russiýa we Özbegistana 600 tonna töweregi polipropilen ýüplügi eksport edildi
«Bagtyýar gurluşyk» hojalyk jemgyýeti 600 tonna töweregi polipropilen ýüplügini eksport etdi. Hususan-da, kompaniýa bu önümi Türkiýä, Russiýa we Özbegistana iberdi diýip, Türkmenistanyň Senagatçylar we telekeçiler birleşmesi habar berdi.
Türkmenistanda Beýik Watançylyk urşunda gazanylan Ýeňşiň 80 ýyllygy bellenildi
9-njy maýda Türkmenistanda şanly baýram — 1941 — 1945-nji ýyllaryň Beýik Watançylyk urşunda gazanylan Ýeňşiň 80 ýyllygy bellenildi. Aşgabatdaky “Halk hakydasy” ýadygärlikler toplumynda geçirilen gül goýmak dabarasyna türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow gatnaşdy.
Türkmenistanyň Prezidenti Beýik Ýeňşiň 80 ýyllygy mynasybetli Moskwada geçirilen dabaralara gatnaşdy
9-njy maýda Prezident Serdar Berdimuhamedow iş sapary bilen Russiýa Federasiýasyna bardy. Ol ýerde Türkmenistanyň Prezidenti Russiýanyň Prezidenti Wladimir Putiniň çakylygy boýunça 1941 — 1945-nji ýyllaryň Beýik Watançylyk urşunda gazanylan Ýeňşiň 80 ýyllygynyň hormatyna Moskwada geçirilýän dabaraly çärelere gatnaşdy diýip, TDH habar berýär.
2021-nji ýylda Türkmenistanyň Gruziýa nebit we nebit önümleriniň eksportyndan girdejisi 191 mln dollardan geçdi
2021-nji ýylyň jemleri boýunça Türkmenistanyň Gruziýa nebit we nebit önümleriniň eksporty 191,8 million dollara barabar boldy, bu 2020-nji ýyl bilen deňeşdirilende 186,2% artykdyr. Bu barada Trend agentligi Gruziýanyň Milli statistika müdirligine salgylanyp habar berýär.
Nebitgaz toplumynda dört aýyň jemlerine garaldy
Türkmenistanyň nebitgaz toplumynyň merkezi binasynda Halkara parahatçylyk we ynanyşmak ýylynyň dört aýynda ýerine ýetirilen işleriň jemine bagyşlanan hasabat ýygnagy geçirildi. Onda 8-nji maýda hormatly Prezidentimiz Serdar Berdimuhamedowyň milli ykdysadyýetimiziň pudaklarynda şu ýylyň dört aýynda alnyp barlan işleriň netijelerine bagyşlap, sanly ulgam arkaly geçiren Türkmenistanyň Ministrler Kabinetiniň mejlisinde ýurdumyzyň nebitgaz toplumynyň öňünde goýan wezipeleri ara alnyp maslahatlaşyldy.