Ýaş himikleriň bäsleşigi jemlenildi
04:20 29.04.2025 2632
Ýagşygeldi Kakaýew adyndaky Halkara nebit we gaz uniwersiteti tarapyndan guralan «Zehinli ýaş himikler» atly bäsleşik jemlenildi. Orta mekdep okuwçylarynyň himiýa dersi boýunça taýýarlyk derejelerini ýokarlandyrmak, olardan aýratyn zehinlilerini ýüze çykarmak, okuwa höweslendirmek, olaryň geljekde hünär saýlamaklaryna oňyn şert döretmek maksady bilen geçirilen bäsleşige ýurdumyzyň ähli welaýatlaryndan, Aşgabat, Arkadag şäherlerinden ýurdumyzyň umumybilim berýän orta mekdepleriniň, aýratyn çuňlaşdyrylyp okadylýan orta okuw mekdepleriniň uçurym okuwçylary gatnaşdylar.
Garaşylyşy ýaly, bäsleşik zehinli okuwçylary ýüze çykardy, olaryň ukyp-başarnygyny açmaklyga, tebigy we takyk ylymlara degişli dersleri çuňňur öwrenmeklerine, pikir alyşmaklaryna, himiýadan takyk meseleleri çözmekde gyzyklanmasynyň artmagyna, pikirlenmek ukybynyň ösmegine ýardam etdi we ýaş zehinlere usuly kömek boldy. Bu möhüm çäräni geçirmek üçin guramaçylyk toparynyň döredilenligini bellemelidir. Guramaçylyk toparynyň düzümindäki uniwersitetimiziň umumy himiýa kafedrasynyň mugallymlary himiýadan ýumuşlary taýýarladylar hem-de okuwçylaryň ýerine ýetiren işlerini bahalandyrdylar.
«Zehinli ýaş himikler» atly bäsleşigiň 1-nji tapgyry 14-nji aprelde test görnüşinde onlaýn tertibinde geçirilipdi. Geçen anna güni zehinli himikleriň bu bäsleşiginiň 2-nji tapgyry ýumuş bermek arkaly Ýagşygeldi Kakaýew adyndaky Halkara nebit we gaz uniwersitetinde boldy. Jemleýji tapgyrynyň ýeňijileri Ýagşygeldi Kakaýew adyndaky Halkara nebit we gaz uniwersitetiniň Maglumat tehnologiýa merkeziniň maslahat zalynda yglan edildi we uniwersitetiň Hormat hatlary, diplomlary bilen sylaglanyldy. Bäsleşigiň 2-nji jemleýji tapgyrynyň çäklerinde medeni çärelere giň orun berildi. Şunda bäsleşige gatnaşyjylar bilen uniwersitetimiziň ýolbaşçylarynyň, professor-mugallymlarynyň, ylmy işgärleriniň, şeýle hem okuwda, ylymda, sport ýaryşlarynda ýokary netijeleri gazanan talyplaryň duşuşyklary we gyzykly gezelençler guraldy.
Guramaçylyk toparynyň çözgüdi esasynda bäsleşigiň ýeňijilerinden has ýokary netije gazananlara bu ýokary okuw mekdebinde okuwyny dowam etdirmäge ýeňillikleriň dörediljekdigini bellemelidir.
Yragyň wekiliýeti «Türkmengaz» DK bilen türkmen tebigy gazyny satyn almagyň mümkinçiliklerini maslahatlaşdy
Türkmenistanyň Nebitgaz toplumynyň Merkezi binasynda «Türkmengaz» döwlet konserniniň ýolbaşçylygy bilen Türkmenistana sapar bilen gelen Yrak Respublikasynyň arasynda gepleşikler geçirildi. Yragyň wekiliýetine Energetika ministriniň orunbasary Adil Karim Kak Ahmed we nebit ministriniň orunbasary Ezat Sabir Esmail ýolbaşçylyk etdi.
Türkmenistanyň ýangyç-energetika toplumynda ýedi aýda alnyp barlan işleriň netijelerine garaldy
27-nji awgustda Türkmenistanyň nebitgaz toplumynyň merkezi binasynda Arkadag Serdarly bagtyýar ýaşlar ýylynyň geçen ýedi aýynda ýerine ýetirilen işleriň jemlerine bagyşlanan hasabat ýygnagy geçirildi. Onda 25-nji awgustda hormatly Prezidentimiz Serdar Berdimuhamedowyň ýurdumyzyň ykdysadyýetiniň pudaklarynda alnyp barlan işleriň netijelerine bagyşlap sanly ulgam arkaly geçiren Türkmenistanyň Ministrler Kabinetiniň mejlisinde nebitgaz toplumynyň öňünde goýan wezipeleri ara alnyp maslahatlaşyldy hem-de bu ugurda işleri has-da ilerletmegiň anyk ýollary kesgitlenildi.
Türkmenistanyň Halk Maslahatynyň Başlygy we Palestinanyň daşary işler ministri özara bähbitli hyzmatdaşlygy ýola goýmagyň mümkinçiliklerini maslahatlaşdylar
Penşenbe güni türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Palestina Döwletiniň daşary işler we daşary ýurtlarda ýaşaýan palestinalylaryň işleri boýunça ministri Riýad al-Malikiniň arasynda geçirilen duşuşykda özara bähbitli türkmen-palestina ykdysady gatnaşyklaryny ýola goýmak üçin giň mümkinçilikleriň barlygy maslahatlaşyldy diýip, TDH habar berýär.
Ýanwar-iýul aýlarynda Türkmenistanda jemi içerki önümiň ösüşi 6,2% boldy
2023-nji ýylyň ýanwar-iýul aýlarynda Türkmenistanda jemi içerki önümiň ösüş depgini 6,2% boldy. Bu barada maglumat geçen anna güni sanly ulgam arkaly geçirilen Hökümet mejlisinde aýdyldy.
Türkmenistanyň we Malaýziýanyň DIM-niň wekilleri söwda, energetika we beýleki ugurlarda hyzmatdaşlyk meselelerini maslahatlaşdylar
Çarşenbe güni Türkmenistanyň Daşary işler ministrliginde Türkmen-Malaýziýa DIM-leriniň arasynda onlaýn görnüşde geňeşmeler geçirildi. Geňeşleriň dowamynda iki ýurduň diplomatlary syýasy-diplomatik, söwda-ykdysady, energetika we ynsanperwer ugurlarda köptaraplaýyn we ikitaraplaýyn hyzmatdaşlygyň köp meselelerini ara alyp maslahatlaşdylar diýip, Türkmenistanyň DIM-niň saýty habar berýär.