Kuala-Lumpurda TEIF 2025 forumy Türkmenistana bolan gyzyklanmanyň artýandygyny görkezdi
09:36 25.04.2025 5854
2025-nji ýylyň 23-24-nji aprelinde Malaýziýanyň paýtagty Kuala-Lumpurda geçirilen Türkmenistanyň ykdysadyýetine daşary ýurt maýa goýumlaryny çekmek boýunça halkara forumy TEIF 2025 öz işini tamamlady.
Forumyň soňky gününde geçirilen jemleýji panel sessiýasynda wekiller arassa energiýanyň durnukly geljegi gurmadaky orny, metan we CO₂ zyňyndylarynyň azaldylmagy, şeýle hem bu ulgamda monetizasiýa mümkinçilikleri barada pikir alyşdylar. Bu sessiýa Türkmenistanyň klimat boýunça alyp barýan syýasatyna bagyşlanyp, ýurduň Global Metan Ylalaşygyna (Global Methane Pledge) goşulmagy we Halkara Metan Zyňyndylary Obserwatoriýasy (IMEO) bilen bilelikdäki taslamasy arkaly MARS ulgamy arkaly maglumat alyşmalary ösdürmek baradaky tagallalary nygtaldy.
Şeýle hem Aral we Hazar deňizleri bilen baglanyşykly başlangyçlar, sebitiň howanyň üýtgemegine uýgunlaşmak boýunça Türkmenistanyň BMG-niň Daşky gurşaw boýunça maksatnamasy (UNEP) bilen hyzmatdaşlygy bilen tanyşdyryldy.
Mejlisde çykyş edenleriň hatarynda “Türkmengaz” döwlet konserniniň başlygynyň orunbasary Myrat Arçaýew, Energiýanyň gaýtadan dikeldilýän çeşmeleri boýunça halkara agentliginiň (IRENA) baş direktory Françesko La Kamera (wideoýüzlenme arkaly), Hazar deňzi institutynyň direktory Myrat Atajanow, “Kayrros” kompaniýasynyň esaslandyryjysy we baş analitigi Antuan Halff, Global gaz merkeziniň ýerine ýetiriji direktory Waleri Dýukro, “Petronas” kompaniýasynyň kömürturşy gazlarynyň dolandyrylyşy bölüminiň ýokary derejeli menejeri Emri Hişam B. Ýusof, “GHGSat Inc.” kompaniýasynyň strategiýa boýunça wise-prezidenti Žan-Fransua Gote, “Capterio” kompaniýasynyň baş direktory Mark Deýwis (onlaýn) we “Tegre” korporasiýasynyň strategiki ösüş boýunça direktory Kleýton Neş dagy çykyş etdiler.
Çykyşlarda nebitgaz pudagynda metan we CO₂ zyňyndylaryny azaltmak strategiýalary, Türkmenistanyň Global Metan borçnamalaryna ygrarlylygy we UNEP hem-de IMEO bilen hyzmatdaşlygy aýratyn bellenildi. Şol sanda kömürturşy gazlaryny tutmak, ulanmak we saklamak babatynda innowasion çözgütler, şeýle hem bu ugurda maýa goýumlaryny çekmek üçin syýasatlar we höweslendiriji çäreler ara alnyp maslahatlaşyldy. Türkmenistanyň durnukly ösüş uguryndaky tagallalary — döwrebap tehnologiýalaryň, gaýtadan dikeldilýän energiýanyň we kadalaşdyryjy hukuk binýadynyň ulanylmagy bilen baglanyşykly öňegidişlikler, şeýle hem Derweze kraterinde gaz zyňyndylarynyň dolandyrylyşy boýunça gazanylan üstünlikler görkezildi.
Sesssiýanyň soňunda Türkmenistanyň Prezidenti Serdar Berdimuhamedowa gatnaşyjylar tarapyndan Ýüzlenme kabul edildi.
Şol gün daşary ýurt kompaniýalarynyň ýolbaşçylarynyň Türkmenistanyň nebitgaz, maliýe, himiýa, gurluşyk we energetika ulgamlarynyň ýolbaşçylary bilen ozal ylalaşylan duşuşyklary geçirildi. Bu duşuşyklaryň netijesinde hyzmatdaşlyk boýunça birnäçe resminamalara gol çekildi.
“Türkmengaz”, “Türkmennebit” döwlet konsernleriniň we Türkmenistanyň Söwda-senagat edarasynyň “Türkmen Energiýa Forumy” hojalyk jemgyýeti bilen hyzmatdaşlykda guran TEIF 2025 forumy dünýäniň dürli künjeklerinden 42 ýurtdan 470 wekili bir ýere jemläp, ykdysady hyzmatdaşlygyň täze ugurlaryny öwrenmek üçin giň mümkinçilik döretdi. Bu forum Türkmenistanyň Ýewraziýa giňişligindäki esasy maýa goýum ugurlarynyň birine öwrülýändigini nobatdaky gezek görkezdi.
Yragyň wekiliýeti «Türkmengaz» DK bilen türkmen tebigy gazyny satyn almagyň mümkinçiliklerini maslahatlaşdy
Türkmenistanyň Nebitgaz toplumynyň Merkezi binasynda «Türkmengaz» döwlet konserniniň ýolbaşçylygy bilen Türkmenistana sapar bilen gelen Yrak Respublikasynyň arasynda gepleşikler geçirildi. Yragyň wekiliýetine Energetika ministriniň orunbasary Adil Karim Kak Ahmed we nebit ministriniň orunbasary Ezat Sabir Esmail ýolbaşçylyk etdi.
Türkmenistanyň ýangyç-energetika toplumynda ýedi aýda alnyp barlan işleriň netijelerine garaldy
27-nji awgustda Türkmenistanyň nebitgaz toplumynyň merkezi binasynda Arkadag Serdarly bagtyýar ýaşlar ýylynyň geçen ýedi aýynda ýerine ýetirilen işleriň jemlerine bagyşlanan hasabat ýygnagy geçirildi. Onda 25-nji awgustda hormatly Prezidentimiz Serdar Berdimuhamedowyň ýurdumyzyň ykdysadyýetiniň pudaklarynda alnyp barlan işleriň netijelerine bagyşlap sanly ulgam arkaly geçiren Türkmenistanyň Ministrler Kabinetiniň mejlisinde nebitgaz toplumynyň öňünde goýan wezipeleri ara alnyp maslahatlaşyldy hem-de bu ugurda işleri has-da ilerletmegiň anyk ýollary kesgitlenildi.
Türkmenistanyň Halk Maslahatynyň Başlygy we Palestinanyň daşary işler ministri özara bähbitli hyzmatdaşlygy ýola goýmagyň mümkinçiliklerini maslahatlaşdylar
Penşenbe güni türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Palestina Döwletiniň daşary işler we daşary ýurtlarda ýaşaýan palestinalylaryň işleri boýunça ministri Riýad al-Malikiniň arasynda geçirilen duşuşykda özara bähbitli türkmen-palestina ykdysady gatnaşyklaryny ýola goýmak üçin giň mümkinçilikleriň barlygy maslahatlaşyldy diýip, TDH habar berýär.
Ýanwar-iýul aýlarynda Türkmenistanda jemi içerki önümiň ösüşi 6,2% boldy
2023-nji ýylyň ýanwar-iýul aýlarynda Türkmenistanda jemi içerki önümiň ösüş depgini 6,2% boldy. Bu barada maglumat geçen anna güni sanly ulgam arkaly geçirilen Hökümet mejlisinde aýdyldy.
Türkmenistanyň we Malaýziýanyň DIM-niň wekilleri söwda, energetika we beýleki ugurlarda hyzmatdaşlyk meselelerini maslahatlaşdylar
Çarşenbe güni Türkmenistanyň Daşary işler ministrliginde Türkmen-Malaýziýa DIM-leriniň arasynda onlaýn görnüşde geňeşmeler geçirildi. Geňeşleriň dowamynda iki ýurduň diplomatlary syýasy-diplomatik, söwda-ykdysady, energetika we ynsanperwer ugurlarda köptaraplaýyn we ikitaraplaýyn hyzmatdaşlygyň köp meselelerini ara alyp maslahatlaşdylar diýip, Türkmenistanyň DIM-niň saýty habar berýär.