Ýurdumyzyň beýleki ýokary we ýörite orta hünär okuw mekdeplerinde bolşy ýaly, «Türkmengaz» döwlet konserniniň Mary nebitgaz orta hünär okuw mekdebinde-de hormatly Prezidentimiziň öňdengörüjilikli syýasaty esasynda ýaşlaryň saýlap alan hünärini kämil derejede ele almaklary üpjün edilýär. Okuw mekdebinde hünär alan ýaşlaryň uly topary her ýylda döwletimiziň milli ykdysadyýetiniň esasy pudagy bolan nebitgaz senagatynyň edara-kärhanalarynyň önümçiligine işe ugradylýar.
Şu ýylda hem talyp ýaşlar mekdebiň mugallymlarynyň ýolbaşçylygynda, edara-kärhanalaryň hünärmenleriniň goldaw bermeklerinde okuw hem önümçilik tejribeliklerini üstünlikli geçdiler. Birinji hem-de ikinji ýyllyk talyplar bilen okuw hem-de önümçilik tejribelikleriniň «Türkmengaz» döwlet konserniniň edara-kärhanalarynyň önümçiliginde geçirilendigini aýtmak gerek. Elektroenergetiki ulgamlaryň awtomatizasiýasy we rele goragy, senagat enjamlaryny gurnamak we tehniki taýdan ulanmak hünärini ele alýan birinji ýyl talyplar awtomatik enjamlarda üýtgeýän we hemişelik tok arkaly elektrik abzallaryny programmanyň kömegi bilen dolandyrmaklygy içgin öwrendiler. Talyp ýaşlar dünýäniň ösen döwletlerinde öndürilen kämil tehnologiýaly awtomatik abzallary sanly ulgam arkaly dolandyrmaklygyň tehnologiýasyny hem özleşdirdiler. Hünärmenleriň täze tehnologiýaly döwrebap enjamlary özleşdirmekleri üçin beren maslahatlary, geçiren tejribelik okuw sapaklary ýaşlaryň hünäri çuňňur öwrenmeklerine ýardam berdi.
