Geçen asyryň 70 — 80-nji ýyllarynda paýtagtymyzdaky öňki Türkmen politehniki institutynda (häzirki Türkmen döwlet binagärlik-gurluşyk instituty) nebitçiniň, gazçynyň hünärini alyp gelen ýokary bilimli ýaşlaryň hasabyna pudakda ilkinji milli hünärmenlerimiz ösüp ýetişdi.
Manyly ömrüniň kyrk ýylyny ýa-da bütin zähmet ýoluny ülkämiziň gaz senagaty ulgamynyň dürli edara-kärhanalarynda zähmet çekmeklige sarp eden tejribeli hünärmen Akmuhammet Aşyrow hem şolaryň biri. Onuň ýetginjeklik ýyllary Mary welaýatynyň çägindäki Gündogar Şatlyk we Günbatar Şatlyk gaz känleriniň ýokary depgin bilen özleşdirilip başlanylan, gazçylaryň Şatlyk şäheriniň gurluşygynyň gyzgalaňly alnyp barylýan ýyllaryna gabat geldi.
