Gaz gorunyň möçberi boýunça dünýäde öňdäki orunlaryň birini eýeleýän «Galkynyş» gaz käninden tebigy gazyň çykarylmagynda, gaýtadan işlenip, sarp edijilere ýetirilmeginde «Türkmengaz» döwlet konserniniň «Marygazçykaryş» müdirliginiň hyzmat ediş gulluklarynyň edara-kärhanalarynyň hem saldamly goşantlary bar. Müdirligiň durmuş taýdan dolandyryş edarasynyň suw, bug üpjünçilik sehiniň «Galkynyş» suw arassalaýjy desgalar toplumy hem şol kärhanalaryň biridir.
Hytaý Halk Respublikasynyň öňdebaryjy kompaniýasynyň hünärmenleri bilen türkmen gurluşykçylary tarapyndan bilelikde gurlan bu kärhana indi on üç ýyla golaý wagt bäri bökdençsiz, durnukly işläp, «Galkynyş» gaz käniniň tebigy gazy kükürtden arassalaýan kuwwatly kärhanalaryny, bu ýerdäki işçiler şäherçelerini arassa suw bilen doly üpjün edýär. Kärhanada ornaşdyrylýan kämil tehnologiýaly enjamlar suwy ýokary hilli arassalap, sarp edijilere ýetirmeklige mümkinçilik berýär.
