Täze gidrawlik enjam netijeliligi bilen tapawutlanýar
04:10 10.06.2025 2450
Ýagşygeldi Kakaýew adyndaky Halkara nebit we gaz uniwersitetiniň geologiýa we geohimiýa kafedrasynda «Buraw turbalarynyň boşluklaryndan howany gysyp çykarmak üçin innowasion gidrawlik enjam» işlenip düzüldi.
Agzalan ýokary okuw mekdebiniň professor-mugallymlary — tehniki ylymlaryň doktory Arslan Geldimyradow, uly mugallym Döwran Esenow, uly mugallym Rejepguly Gulmämmedow, mugallym Mahmut Haýdarow tarapyndan oýlanyp tapylan enjama Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugyndan 956 belgili çäklendirilen patent alyndy.
Innowasion gidrawlik enjam burawlaýjy turbalar, oturtma sütünler guýa goýberilen wagty olaryň içini buraw ergini bilen dolduryp, buraw turbalarynyň, oturtma sütünleriniň içki boşluklaryndaky howa toplanmalaryny gysyp çykarmak üçin niýetlenendir.
Bu enjamy önümçilige ornaşdyrmak maksady bilen Ýagşygeldi Kakaýew adyndaky HNGU-nyň mugallymlary hem-de «Türkmengazburawlaýyş» müdirliginiň hünärmenleri bilelikde «Türkmengaz» döwlet konserniniň «Türkmengazburawlaýyş» müdirliginiň «Galkynyş» gaz känindäki 261-nji guýusynda 1 müň 600 metr, 263-nji guýusynda 2 müň 350 metr, 231-nji guýusynda 3 müň 496 metr we 264-nji guýusynda 4 müň 19 metr çuňluklarda ulanyp, üstünlikli synag edildi. Synagyň netijesinde guýularda buraw işlerini kämilleşdirmek boýunça ylmy taýdan işlenip düzülen innowasion gidrawlik enjamy önümçilik işlerinde ulanmak bilen, guýulary burawlamak prosesinde guýynyň düýbündäki basyşyň üýtgemegi netijesinde ýüze çykýan päsgelçilikleriň öňüni alyp bolýandygyna göz ýetirildi.
Bu mugallymlaryň işleriniň ýene-de biri «Pnewmatiki suw çüwdürimli ýuwujy enjam» diýip atlandyrylýar. Ol buraw desgalaryny, onuň agregatlaryny, detallaryny ýuwmak, arassalamak, iş wagtyny, suwy tygşytlamak, ekologik howpsuzlygy üpjün etmek, netijede, çykdajylary azaltmak, çylşyrymly tehnologiýalaryň kadaly, ýokary hilli, uzak möhletli işledilmegini gazanmak maksady bilen işlenip düzüldi. Bu enjama hem Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugyndan 935 belgili çäklendirilen patent alyndy.
Uçar kerosini — birža söwdalarynyň öň hatarynda
Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 6-sy hasaba alyndy.
Balkan welaýatynda Güýjik meýdançasynda täze guýy burawlanylýar
Balkan welaýatynda Güýjik meýdançasynda taslama çuňlugy 2 müň 60 metr bolan № 148 ulanyş guýusynda buraw işleri alnyp barylýar.
Türkmenistan owgan halkyna ynsanperwer goldaw bermäge çagyrdy — DIM
Türkmen tarapy dünýä jemgyýetçiligini, ilkinji nobatda bolsa, Yslam Hyzmatdaşlyk Guramasynyň döwletlerini owgan halkyna goldaw bermäge çagyrdy. Bu barada Pakistanyň paýtagty Yslamabat şäherinde geçirilen «Owganystandaky ynsanperwerlik ýagdaýlary» mowzugy boýunça Yslam Hyzmatdaşlyk Guramasynyň Daşary işler ministrleriniň Geňeşiniň nobatdan daşary mejlisinde beýan edildi diýip, Türkmenistanyň daşary syýasat edarasynyň saýty habar berýär.
Türkmenistanyň, Hindistanyň we Pakistanyň daşary işler ministrleri energetika ulgamynda hyzmatdaşlygy maslahatlaşdylar
18-20-nji dekabrda türkmen wekiliýetiniň Pakistana we Hindistana iş saparynyň çäklerinde energetika ulgamynda, hususan-da, Türkmenistan – Owganystan – Pakistan – Hindistan transmilli gaz geçirijisiniň gurluşygy ulgamynda hyzmatdaşlygy işjeňleşdirmek meselesi ara alnyp maslahatlaşyldy.
Aşgabatda «Hazar deňzi - durnukly ösüş we dolandyryş» atly okuw sapaklary başlandy
14-nji iýulda Aşgabatda Türkmenistanyň Daşary işler ministrliginiň, nebit-gaz toplumynyň, Türkmenistanyň Hazar deňzi institutynyň Halkara ummanlar instituty bilen hyzmatdaşlykda guramagynda iki hepdelik «Hazar deňzi – durnukly ösüş we dolandyryş» atly okuw sapaklary başlandy. Bu barada Türkmenistanyň Daşary işler ministrligi habar berýär.