Türkmenistanyň Nebitgaz senagaty toplumynyň işgärleriniň kärdeşler arkalaşygynyň Geňeşi, Türkmenistanyň Medeniýet, sport, syýahatçylyk we jemgyýetçilik guramalarynyň işgärleriniň kärdeşler arkalaşygynyň Geňeşi tarapyndan «Halkymyzyň joşgunly, tutanýerli zähmeti esasynda ýetilen belent sepgitlerde kärdeşler arkalaşygynyň tutýan orny» atly okuw maslahaty geçirildi. «Türkmennebit» döwlet konserniniň Kärdeşler arkalaşygynyň komiteti okuw maslahatynyň guramaçylyk işlerine giňden ýardam berdi.

Türkmenistanyň Kärdeşler arkalaşyklarynyň Milli merkezi (TKAMM) tarapyndan «Awaza» milli syýahatçylyk zolagyndaky «Daýanç» sagaldyş merkezinde «Pähim-paýhas ummany Magtymguly Pyragy» ýylynyň 7 — 11-nji oktýabry aralygynda geçirilen okuw maslahatyna ýokarda agzalan pudaklaryň KA-nyň ilkinji guramalarynyň başlyklary, işjeň agzalary, TKAMM-yň jogapkär işgärleri gatnaşdy.

Okuw maslahatynyň birinji gününde KA-nyň ilkinji guramalarynda statistik hasabatlary ýöretmek, medeni-köpçülik çärelerini geçirmek bilen bagly guramaçylyk işleri, sport bäsleşikleriniň düzgünnamalaryny düzmek, edara-kärhanalarda köpçülikleýin şertnamalary baglaşmak we olaryň ýerine ýetirilişi hakynda çykyşlar boldy. Şunda, hususan-da, kärdeşler arkalaşygynyň işiniň dogry ýola goýluşy, hormatly Prezidentimiziň, türkmen halkynyň Milli Lideriniň alyp barýan döwlet syýasatlarynyň ýurdumyzy özgertmekdäki, halkymyzyň ýaşaýyş-durmuş şertlerini gowulandyrmakdaky ägirt uly ähmiýeti, ony medeni-köpçülik çärelerinde jemgyýetçilik guramalarynyň, şol sanda kärdeşler arkalaşyklarynyň ilkinji guramalarynyň edara-kärhanalarda wagyz etmekliginiň ähmiýeti, ýaşlaryň arasynda watansöýüjilik, millilik duýgularyny ösdürmek barada gürrüň edildi. Bular barada «Türkmennebit» DK-nyň Kärdeşler arkalaşygynyň komitetiniň başlygy Akmyrat Amanow, «Daşoguzgazüpjünçilik» müdirliginiň kärdeşler arkalaşygynyň ilkinji guramasynyň başlygy Aşyrberdi Berdiýew, Türkmenistanyň Telewideniýe, kinematografiýa we radiogepleşikler baradaky döwlet komitetiniň kärdeşler arkalaşygynyň ilkinji guramasynyň başlygy Bilbil Jumaýewa we beýlekiler çykyş etdi.

Günortan arakesmeden soň okuw maslahaty öz işini dowam etdi we zähmet borçlarynyň ýerine ýetirilmegi bilen baglanyşykly meseleler, önümçiliklerde zähmet düzgün-tertibiniň dogry ýola goýluşy, zähmet adamlarynyň hukuklary, olara dürli sebäpler ýüze çykanda KA-nyň guramalary tarapyndan ýardam bermegiň düzgünleri barada söz sözlenildi. Bular barada TKA-nyň agzalarynyň durmuş-zähmet hukuklaryny goramak boýunça işgärleriniň çykyşlary diňlenildi.

Çäräniň ikinji gününde Berkarar döwletiň täze eýýamynyň Galkynyşy döwründe ýurdumyzda gazanylýan üstünlikler, oňa ýaşlaryň işjeň gatnaşygy, ýurdumyzy ösdürmekde ýaşlaryň saldamly goşandy, olaryň öňünde duran wezipeler barada Türkmenistanyň Medeniýet, sport, syýahatçylyk we jemgyýetçilik guramalarynyň işgärleriniň kärdeşler arkalaşygynyň Geňeşiniň başlygy Ene Mämmedowanyň çykyşy diňlenildi. Söz nobaty berlen TKA-nyň Merkezi derňew toparynyň baş derňewçisi Rahman Çaryýewiň, «Türkmengaz» döwlet konserniniň Ylmy-barlag tebigy gaz institutynyň kärdeşler arkalaşygynyň ilkinji guramasynyň başlygy Myrat Baýramgylyjowyň çykyşlarynda KA-nyň ilkinji guramalarynda maliýe resminamalarynyň alnyp barlyşy we olaryň düzgüni barada giňden beýan edildi, şeýle-de zähmet gatnaşyklary, zähmetkeşleriň zähmetiniň goragyna bolan gatnaşyklary, Türkmenistanyň Zähmet kodeksine girizilen üýtgetmeler, goşmaçalar barada sorag-jogap alşyldy.

Okuw maslahatynyň üçünji gününde kärdeşler arkalaşyklary, olaryň hukuklary, işiniň kepillikleri hakynda Türkmenistanyň Kanunynyň, Türkmenistanyň Kärdeşler arkalaşyklarynyň tertipnamasynyň hem-de tassyklanan düzgünnamasynyň ýerine ýetirilişi barada TKA-nyň agzalarynyň durmuş-zähmet hukuklaryny goramak boýunça bölüminiň baş hukukçysy Hydyr Gurbanowyň çykyşynda beýan edildi.

«Daýanç» sagaldyş merkezinde guramaçylykly geçirilen okuw maslahatynyň soňky günlerinde hem möhüm meseleler barada gürrüň gozgaldy. Türkmenistanyň Prezidenti hormatly Serdar Berdimuhamedowyň baştutanlygynda ýurdumyzyň nebitgaz, medeniýet pudaklaryny ösdürmek babatynda kabul edilen maksatnamalar bilen giňişleýin tanyşdyryldy.

Okuw maslahatynyň çäklerinde «Daýanç» sagaldyş merkeziniň sport toplumyndaky açyk we ýapyk meýdançalarda sagdyn durmuşy dabaralandyrýan çäreler, bäsleşikler, Awazanyň gözel ýerlerine gezelençler guraldy. Her gün agşamlyk nebitgaz toplumynyň Medeni-işewürlik merkeziniň, medeniýet pudagynyň aýdymçylarynyň, artistleriniň, «Türkmennebit» döwlet konserniniň Türkmenbaşydaky nebiti gaýtadan işleýän zawodlar toplumynyň medeniýet merkeziniň orkestriniň, estrada sazandalarynyň çykyşlarynyň ýerine ýetirilmegi okuw maslahatynyň we beýleki köpçülikleýin çäreleriň täsirini hasam artdyrdy. Bu ýerde geçirilen dürli bäsleşiklere işjeň gatnaşan KA-nyň agzalaryna ýadygärlik sowgatlary gowşuryldy.