Bu burawlaýjylar toparynyň agzalarynyň atlary diňe bir «Lebapnebitgazgözleg» ekspedisiýasynda däl, eýsem, tutuş «Türkmengeologiýa» döwlet korporasiýasynda hem öňdebaryjylaryň hatarynda hormat bilen agzalýar. Munuň özi ýöne ýerden däldir. Biziň aşakdaky ýazgylarymyz hem bu öňdebaryjy toparyň agzalarynyň alyp barýan tutumly işleri, olaryň ýolbaşçysy, umumy işe mynasyp goşant goşýan adamlar hakynda bolar.
Bu topara buraw desgasynyň başlygy Halmyrat Rozyýew başarjaňlyk bilen ýolbaşçylyk edýär. Tejribeli ýolbaşçy uzak ýyllaryň dowamynda Watanymyzyň ösüşlerine goşýan saldamly goşandy, ak ýürekden çekýän halal zähmeti üçin «Türkmenistanyň Garaşsyzlygynyň 20 ýyllygyna» medaly bilen sylaglandy. Şonda Halmyrat döwlet sylagyny diňe bir şol döwre çenli bitiren işlerine berlen mynasyp baha hökmünde kabul etmändi. Bu ýokary sylag onda geljekde has yhlasly we maksada okgunly zähmet çekmek höwesini hem döredipdi.
