“Türkmenistanyň nebiti we gazy — OGT 2026” atly XXXI halkara maslahatynyň we sergisiniň öňüsyrasynda, 2026-njy ýylyň 20-nji oktýabrynda Birleşen Milletler Guramasynyň ýokary derejeli tegelek stoly geçiriler.
Tegelek stoluň mowzugy — «Ygtybarly, elýeterli we durnukly energetika: halkara hyzmatdaşlyk arkaly 7-nji Durnukly ösüş maksadyny ilerletmek». Duşuşygyň dowamynda ygtybarly, elýeterli we durnukly energetikany üpjün etmegiň 7-nji Durnukly ösüş maksadyna ýetmegiň esasy şertleriniň biri hökmündäki ähmiýeti, ykdysady ösüşe ýardam etmek, sebit hyzmatdaşlygyny berkitmek we ekologik durnuklylygy üpjün etmek meseleleri ara alnyp maslahatlaşylar.
Aýratyn üns tebigy gazyň orny, metan zyňyndylaryny azaltmak, energiýa netijeliligini ýokarlandyrmak, sanly tehnologiýalar we durnukly energetika geljegini kemala getirmekde halkara hyzmatdaşlyk meselelerine gönükdiriler.
Tegelek stoluň işine BMG-niň Türkmenistandaky Hemişelik utgaşdyryjysy, BMG-niň Ösüş Maksatnamasynyň (BMGÖM) Türkmenistandaky wekilleri, ÝHHG-nyň Aşgabatdaky Merkezi, Türkmenistanyň Daşary işler ministrligi we ýurdumyzyň ýangyç-energetika toplumynyň kärhanalarynyň wekilleri gatnaşarlar.
