Lebap welaýatynyň Demirgazyk Kükürtli ýatagynda sentýabr aýynyň başynda №3 täze gaz guýusy ulanmaga berildi. Onuň gije-gündizlik debiti 75 müň kub metr tebigy gaza barabardyr. Alynýan gaz Darganata etrabynyň ilatyna hyzmat etmek üçin ugrukdyrylýar.
Ýakyn geljekde täze guýudan gije-gündizde 3 tonna çenli gaz kondensatyny almak meýilleşdirilýär.
Häzirki wagtda «Lebapgazçykaryş» müdirliginiň Kükürtli çyzykly-önümçilik bölüminiň garamagynda Malaý, Bagaja, Sakar, Farap we Kükürtli känleri bar. Bu meýdançalarda işleri utgaşykly guramak, desgalaryň ýokary tehniki ygtybarlylygyny üpjün etmek we guýularyň mümkinçiliklerini netijeli peýdalanmak gaz senagatçylarynyň esasy wezipeleri bolup durýar.
Şu ýylyň geçen sekiz aýynda 4 milliard 804 million 822 müň kub metr meýilnamalaşdyrylanda, bölüm boýunça iş ýüzünde 5 milliard 411 million 536 müň kub metr tebigy gaz gazylyp alnyp, sarp edijilere iberildi. Şeýlelikde, gazyp almak boýunça meýilnama 112,6% ýerine ýetirildi, önümçilik görkezijisi bolsa geçen ýylyň degişli döwri bilen deňeşdirilende 109% düzdi.
Gaz kondensatyny gazyp almakda hem ýokary netijeler gazanyldy. Ýylyň başyndan bäri 2 495 tonna meýilnama bolanlygynda, sekiz aýyň dowamynda gazyp almagyň möçberi 2 920 tonna ýetdi (meýilnamanyň ýerine ýetirilişi — 117%). Taýýarlanan çig mal mundan beýläk gaýtadan işlemek üçin Seýdiniň nebiti gaýtadan işleýän zawodyna iberildi. Bu Kükürtli bölüminiň diňe bir gaz üpjünçiliginde däl, eýsem gaýtadan işleýän senagaty çig mal bilen üpjün etmekde-de möhüm ornuny nygtaýar.
