Türkmenistanyň Garaşsyzlygynyň 29 ýyllygyny mynasyp zähmet sowgatlary bilen garşylanlaryň arasynda «Türkmengeologiýa» döwlet korporasiýasynyň «Türkmennebitgazgözleg» trestiniň «Lebapnebitgazgözleg» ekspedisiýasynyň başarjaň işgärleri hem bar. Olar ýurdumyzda bu şanly senäniň öň ýanynda çuňluk burawlamak baradaky dokuz aýlyk meýilnamalaryny artygy bilen berjaý etdiler.
Gazanylan uly üstünlige buraw ussasy Farhat Rozybaýew tarapyndan baştutanlyk edilýän toparyň agzalary has saldamly goşant goşdular. Olar Balkan welaýatyndaky nebitiň we tebigy gazyň bol gorlarynyň bardygy çaklanylýan Uzynada meýdançasynda taslama çuňlugy 7 müň metre barabar bolan guýyny burawlamak işini tamamladylar. Munuň özi lebaply baýlyk agtaryjylar tarapyndan bu meýdançada burawlanan ikinji guýy bolup durýar.
