Halkymyza durmuşy eşretleriň barha elýeterli bolmagy ugrunda alnyp barylýan giň gerimli işler özüniň gözbaşyny hormatly Prezidentimiziň «Döwlet adam üçindir!» diýen baş ýörelgesinden alýar. Ýaşaýşy abadançylyga besleýän eşretleriň biri-de tebigy gazdyr. Ilatyň döwletli ojaklarynyň her birinde tebigy gazyň alawlap durmagy ugrundaky işler yzygiderli dowam etdirilýär. Bu wajyp işde «Lebapgazüpjünçilik» müdirliginiň «Çärjewetrapgaz» gaz hojalyk edarasynyň başarjaň işgärleri ýokary guramaçylyk we tutanýerlilik görkezýärler.
— Etrabymyz eýeleýän meýdany we ilatynyň sany boýunça welaýatymyzda iri etraplaryň biri hasaplanylýar. Biz häzirki döwürde hususy hojalyklaryň 22,2 müňden gowragyny tebigy gaz bilen üpjün edýäris. Agzybir işgärlerimiz «mawy ýangyjyň» ilata bökdençsiz berilmegini, gazdan tygşytly we howpsuz peýdalanylmagyny gazanmak ugrunda maksada okgunly hem-de yhlasly zähmet çekýärler — diýip, edaranyň başlygy Şeraly Egemberdiýew gürrüň berýär.
