«Türkmengaz» döwlet konserni uglewodorod çig malyny çykarmak boýunça önümçilik maksatnamasyny üstünlikli ýerine ýetirýär. Şu ýylyň üç aýynda ýeriň astyndan tebigy we ugurdaş gazyň 22 milliard kubmetrden gowragy çykaryldy. Bu görkeziji geçen ýylyň degişli döwrüne garanyňda 2,5 milliard kubmetr köp bolup, ösüş depgini 113 göterime deň boldy. «Mawy ýangyjyň» eksporty 16,4 göterim artyp, 10,5 milliard kubmetrden gowrak boldy.
Hormatly Prezidentimiziň tabşyryklaryna laýyklykda, «Marygazüpjünçilik» we «Lebapgazüpjünçilik» müdirliklerinde ýurdumyzyň nebitgaz toplumynyň, şeýle hem Mary we Lebap welaýatlarynyň nebitgaz edaralarynyň we kärhanalarynyň ýolbaşçylarynyň iş maslahatlary geçirildi, olaryň barşynda pudakda amala aşyrylýan işleriň depginini artdyrmak meseleleri ara alnyp maslahatlaşyldy.
