Ýurdumyzda türkmen topragynyň uly baýlygy bolan tebigy gazyň gazylyp alynýan möçberlerini düýpli artdyrmak maksady bilen uly tagallalar edilýär. Il-ýurt bähbitli tutumly işler «Türkmenistanyň nebitgaz senagatyny ösdürmegiň 2030-njy ýyla çenli döwür üçin Maksatnamasynyň» çäginde ýaýbaňlandyrylýar. Şeýle derwaýys çäreler «Türkmengaz» döwlet konserniniň «Lebapgazçykaryş» müdirligini hem giňden gurşap alýar.
— Döwlet Baştutanymyzyň nebitgaz toplumynyň ösüşlere beslenmegi ugrunda edýän ýadawsyz aladalary bizde zähmet joşgunyny döredýär. Baýlyk çykaryjylarymyzyň agzybirlikli zähmet çekmegi netijesinde geçen ýylda tebigy gazy gazyp almakda ýokary sepgitler abraý bilen eýelenildi. Geljekde has ýokary görkezijileri gazanmak üçin hem zerur şertler döredilýär — diýip, müdirligiň düýpli gurluşyk bölüminiň başlygy Myrat Koşaýew gürrüň berýär.
