Mukaddes Garaşsyzlygymyzyň 30 ýyllyk şanly senesi hem-de Gahryman Arkadagymyzyň doglan güni mynasybetli «Türkmennebitönümleri» baş müdirliginiň Gubadag nebit kärhanasynyň garamagyndaky durky düýpgöter täzelenen 170-nji awtoulaglara ýangyç guýujy döwrebap bekediň ulanylmaga berilmegi ýakymly pursatlara baý boldy.
Gubadag — Daşoguz awtoulag ýolunyň gündogar ýakasynda ýerleşýän bu bekediň durkuny täzelemek işlerini Türkmenbaşydaky nebiti gaýtadan işleýän zawodlar toplumynyň «Türkmennebitönümleri» baş müdirliginiň Hojalyk hasaplaşygyndaky abatlaýyş-gurluşyk müdirliginiň Daşoguz welaýat bölüminiň ezber elli gurluşykçylarynyň ýokary hil derejesinde alyp barandyklaryny bellemek bolar. Gubadag etrabyny welaýat merkezi bilen birleşdirýän iri gatnaw ýolunyň ýakasynda binýat tapan bekediň durkuny täzeläp, döwrebaplaşdyrmak ugrunda gysga möhletlerde alnyp barlan gurluşyk-gurnama işlerinde ýokarda ady agzalan bölümiň uly ussasy Amanmyrat Garasaçowyň ýolbaşçylygynda kerpiç örüjiler Sahyt Garlyýew, Mukam Haljanow, suwagçylar Merdan Artykow, Jumabaý Pirjanow, betonçylar Sapa Artykow, Araz Taýlyýew, boýagçy Merdan Mirliýew, elektrik bilen kebşirleýji Atabek Hojamyradow, elektrik ussasy Kuwwat Çaryýew we ýük ýükleýji hem-de düşüriji «DISD» ulagynyň sürüjisi Şatlyk Esenow dagy agzybirlikde zähmet çekmek bilen, öz hünär ussatlyklaryny görkezdiler. Netijede, taslama kuwwaty bir gije-gündiziň dowamynda alty ýüz sany awtoulaga hyzmat etmäge mümkinçiligi bolan, dünýäniň ösen döwletleriniň ýangyç guýujy kompýuterleşdirilen enjamlary bilen doly üpjün edilen döwrebap beket halkyň hyzmatyna berildi.
