Türkmenbaşydaky nebiti gaýtadan işleýän zawodlar toplumynyň «Türkmennebitönümleri» baş müdirliginiň Baýramaly nebit önümleri kärhanasynyň agzybir zähmet adamlary Garaşsyz, baky Bitarap döwletimizde giňden toýlanýan şanly seneleri sowgatly garşylamagy özleri üçin asylly däbe öwürdiler. Olar Aziýanyň merjeni diýip at alan gözel paýtagtymyz Aşgabadyň esaslandyrylmagynyň 140 ýyllyk şanly toýy mynasybetli Mary — Türkmenabat halkara awtomobil ýolunyň ugrundaky durky düýpli täzelenilen 191-nji awtoulaglara ýangyç guýujy bekediň täze binasyny gurup, ulanmaga berdiler.
Bekediň gurluşyk-gurnama işlerini «Marygurluşyk» önümçilik birleşiginiň 7-nji gurluşyk-gurnama müdirliginiň gurluşykçylary ýokary hil derejesinde ýerine ýetirdiler. Beketde dünýäniň ösen döwletlerinde öndürilen kämil tehnologiýaly ýangyç guýujy enjamlar oturdyldy.
