Dispetçer gullugyna ýerlerden gelip gowuşýan hasabatlar şeýle gysgajyk sözler bilen tamamlanýar. Ýöne bu gulaga ýakymly jümlelerde uly many jemlenýär. Ol welaýatyň ilatly ýerleriniň, köpsanly edaralaryň we kärhanalaryň tebigy gaz bilen ygtybarly üpjün edilýändigine, ulgamyň sazlaşykly işlemeginiň gazanylýandygyna aýdyň şaýatlyk edýär. Şeýle jogapkärli işleri «Türkmengaz» döwlet konserniniň «Türkmengazakdyryş» birleşiginiň «Gündogargazakdyryş» müdirliginiň Lebap bölüminiň agzybir işgärleri ussatlarça ýerine ýetirýärler.
— Bölümimiziň hünärmenleri umumy uzynlygy 1790 kilometrden gowrak bolan gaz geçirijilere, şeýle-de gaz paýlaýjy beketleriň 54-sine hyzmat edýärler. Görnüşi ýaly, işimiziň gerimi kiçi-girim däl. Çylşyrymly ulgamyň bökdençsiz we sazlaşykly işlemegini üpjün etmek, tebigy gazdan rejeli we howpsuz peýdalanylmagyny gazanmak üçin ýadawsyz alada edilýär. Bu babatda edýän tagallalarymyz ýerine-de düşýär — diýip, bölümiň zähmeti goramak we tehniki howpsuzlyk boýunça esasy hünärmeni Geldimyrat Rozyýew ýerine ýetirýän işleri hakynda uly gyzyklanma bilen gürrüň berýär.
