Ýurdumyzyň ýangyç-energetika pudagynyň iň iri önümçilik-hojalyk düzümleriniň biri bolan «Türkmennebit» döwlet konserni nebitgazly ýataklarda gözleg-barlag işlerini geçirip we olary işläp taýýarlap, bu binýatlyk ulgamyň ösüşiniň esasy maksatnamalarynyň toplumlaýyn çözgüdini gazanmakda maksada okgunly işleri bitirýär. Hormatly Prezidentimiziň öz öňlerinde goýan belent wezipelerinden ugur alýan konserniň «Nebitgazburawlaýyş» trestiniň buraw işleri müdirlikleriniň hünärmenleri hem şu günler «Türkmenistan — Bitaraplygyň mekany» ýylynyň ruhuna laýyk işleri bitirmegi başarýarlar. Olar diňe bir şu ýylyň geçen hasabat döwründe dag jynslarynyň jemi 125,2 müň metrini gazyp, bellenilen meýilnamany artygy bilen ýerine ýetirdiler. Geçen ýanwar-iýul aýlarynda konsern boýunça senagat taýdan özleşdirilen ýataklardan 2 million 290 müň tonnadan hem gowrak nebitiň we 1 milliard 157 million kubmetre barabar tebigy gazyň çykarylyp, ýedi aýlyk meýilnamalaryň degişlilikde 106,7 göterim we 148,6 göterim berjaý edilmegi-de muny doly tassyklaýar. Bu ýokary netijeleriň gazanylmagynda «Nebitdag» buraw işleri müdirliginiň hünärmenleriniň mynasyp paýy bar. Kärhana boýunça gürrüňi edilýän hasabat döwründe jemi 34 müň 679 metr çuňluk burawlanyldy. Bu görkeziji 3 müň 375 metr çuňlugyň meýilnama goşmaça geçilendigini aňladýar.
Ýeri gelende aýtsak, hormatly
Prezidentimiziň taýsyz tagallasy netijesinde, soňky ýyllarda öz ugurdaş
kärhanalary bilen birlikde, «Nebitdag» buraw işleri müdirligi hem Hytaýdan
hem-de Russiýadan satyn alnan täze, has kuwwatly buraw enjamlaryna eýe boldy. Ol enjamlardyr buraw desgalary 7000 metre çenli çuňluk
geçmäge ukyplylygy bilen tapawutlanýar. Munuň özi miosen gatlaklaryndaky
nebitiň täze çuň ýataklaryny açmaga we özleşdirmek üçin elýeterli gorlaryň
möçberlerini ep-esli giňeltmäge anyk mümkinçilikleri üpjün edýär. Bar bolan
mümkinçilikleri ýerlikli ulanmagy başarýan «Körpeje» BIM-de bolsa geçen ýedi
aýyň dowamynda Günbatar Türkmenistanyň uglewodorod çig mallaryna baý
ýataklarynda 10 sany täze guýuda buraw işleri üstünlikli tamamlanyldy. Olaryň
8-si ulanyş maksatly guýulardyr. Gürrüňi edilýän hasabat döwründe 30 müň 761
metre derek 31 müň 756 metr dag jynslarynyň burawlanmagy müdirlikde gazanylan
üstünlige aýgytly täsirini ýetirdi. Burawlaýjylaryň göreldeli zähmet
netijelerini gazanmaklarynda «Nebitgazburawlaýyş» trestiniň «Burnebitgazhyzmat»
müdirliginiň zähmet toparlarynyň hem önjeýli goşandy bar. Konserniň düzümindäki
«Nebitdag», «Goturdepe», «Körpeje» we «Ekerem» buraw işleri müdirliklerini
gazuw, oturtma bem-de ulanyş turbalary bilen öz wagtynda we bökdençsiz üpjün
etmek şu kärhananyň esasy wezipesi bolup durýar.
Gahryman Arkadagymyzyň hemaýat-goldawlary netijesinde daşary ýurtlardan gelip
gowuşýan täze turbalary gazuw işleri alnyp barylýan meýdançalara öz wagtynda
ýetirmekde, ýükläp-düşürmekde zerur bolan tehnikalar bilen doly üpjün edilen
müdirlikde işler döwrüň ösen talaplaryna laýyk ýola goýulýar. Işiň göreldeli
alnyp barylmagy üçin bu ýerdäki 12,5 tonnalyk göterijiligi bolan köpri-kranlar
hemişe netijeli işledilýär. Kärhanada demir ýol ulaglary arkaly gelip gowuşýan
dürli ölçeglerdäki turbalary öz wagtynda düşürmekde hem-de olary kuwwatly
awtoulaglar bilen degişli buraw işleri müdirliklerine ugratmakda bökdençlige
ýol berilmeýär. Nebit we gaz çykarmak baradaky meýilnamalaryň üstünlikli berjaý
edilmegi üçin ýerine ýetirilýän hyzmatlaryň hilini hemişe ýokary derejede
saklamak we olary toplumlaýyn alyp barmak, guýulary burawlamakda we olaryň
gurluşygyna sarp edilýän möhleti azaltmak üçin zerur çäreleri üpjün etmek,
turbalaryň ulanylyşynyň netijeli bolmagyna gözegçiligi pugta ýola goýmak,
oturtma we buraw turbalaryny iň az zähmet hem-de maddy çykdajylar bilen
ulanmaga taýýarlamak ýaly möhüm işler hut şu müdirlikde ýerine ýetirilýär.
Müdirligiň bölümlerinde burawda ulanylan oturtma turbalara gaýtadan «jan»
bermekde hem netijeli işler bitirilýär. Ol turbalar gaýtadan göneldilip,
hyrlanyp, burawlaýjylara ugradylýar.
