Nazly Tuwakgylyjow 1938-nji ýylda Balkan welaýatynyň Esenguly etrabynyň Çaloýuk obasynda eneden dogulýar. Balkanabat şäherindäki orta mekdepde bilim alýar. Şol ýerdäki nebitçilik orta hünär okuw mekdebini tamamlap, şäherdäki gaz hojalyk edarasynda slesar, ussa, bölüm başlygy wezipelerinde işleýär. Işlän ýyllarynda göreldeli zähmeti üçin Hormat hatlaryna mynasyp bolýar. Nazly şäheriň gaz hojalyk edarasynda işlän 28 ýylynyň içinde ençeme şägirtleri ýetişdirdi.
Nazly heniz başlangyç synpda okaýarka, edebiýat, döredijilik bilen gyzyklanyp ugraýar. Çeper eserleri elinden düşürmän okaýar. 1959-njy ýylda goşun gullugyndaka onuň «Eziz şäherim» atly goşgusy welaýat gazetinde çap edilýär. Şondan soň goşgulary gazet-žurnallarda yzygiderli neşir edilip başlanýar.
