Hormatly Prezidentimiz Gurbanguly Berdimuhamedow şu ýylyň 15-nji ýanwarynda nebitgaz toplumynyň möhüm desgasynyň — «Malaý» gaz känindäki gaz gysyjy desganyň açylyş dabarasyna gatnaşdy. Şu taryhy wakadan bir gün ozal hormatly Prezidentimiziň we Owganystan Yslam Respublikasynyň Prezidenti Mohammad Aşraf Ganiniň gatnaşmaklarynda birbada üç desga — Akina — Andhoý demir ýoly, Kerki (Türkmenistan) — Şibirgan (Owganystan) elektrik geçiriji ulgamy hem-de Ymamnazar — Akina we Serhetabat — Turgundy halkara optiki-süýümli aragatnaşyk ulgamy dabaraly ýagdaýda ulanylmaga berildi.
Il-ýurt bähbitli, dünýä ähmiýetli desgalaryň ulanylmaga berilmegi beýik Garaşsyzlygymyzyň şanly 30 ýyllygynyň giňden belleniljek ýylynda guwandyryjy taryhy wakalarynyň başyny başlandygy bilen hem bellärliklidir. Şeýle-de bu buýsandyryjy sanaw milli Liderimiziň ýurdumyzyň ykdysady kuwwatyny we köp möçberli tebigy baýlyklaryny Ýer ýüzünde parahatçylygy pugtalandyrmaga, özara ynanyşmaga esaslanýan hoşniýetli goňşuçylyk gatnaşyklaryny berkitmäge gönükdirilen parasatly we çuňňur öňdengörüjilikli syýasatlarynyň barha dabaralanýandygynyň aýdyň subutnamasyna öwrüldi.
