«Türkmennebit» döwlet konserniniň nebit çykaryjy kärhanalarynda mehanizmleşen usullaryň biri bolan gazlift usulynyň tehnologik ulanyş aýratynlyklaryna baglylykda we wagtyň geçmegi bilen guýularyň önüminiň azalmagy tebigy ýagdaýdyr. Nebitli ýataklaryň işlenmeginiň soňky tapgyrynda guýularyň gatlaklarynyň basyşynyň peselmegi, olaryň kuwwatynyň gaçmagy netijesinde göteriji turbalarda suwuklygyň (nebitiň) dinamiki derejeleriniň aşak gaçmagy we beýleki geologik-tehniki faktorlaryň täsir etmegi munuň aýdyň mysalydyr.
Ýurdumyzyň günorta-günbatar sebitlerinde, aýratyn-da «Goturdepenebit» we «Nebitdagnebit» nebitgaz çykaryş müdirliklerine degişli çuň we orta çuňlukdaky nebitli gatlakly känleriň esasy gaznasynyň 70 göterimden gowragy nebit çykarmagyň gazlift usulynyň paýyna düşýär.
